Institut d'Estudis Occitans
Label Òc per l'Occitan
  • Òc
  • Français
  • English

L’IEO Lemosin expòrta sas competéncias

Qu’es dos de l’esquipa de l’IEO Lemosin, lu Pascal Boudy e lu Joan-Peire Lacomba, que venen de partir en Alemanha, a Mannheim.

A l’origina de ‘quela surtida au delai dau Rin, la rencontra i a un an, a Bèl Luéc en Corresa, dau Doctor Eva Martha Eckkrammer. ‘Quela femna, lingüista, especialista de las lengas romanas e de las lingas minoritàrias, es professor au despartament de romanistica de l’Universitat de Mannheim. Era venguda per l’anniversari daus trente ans dau bessonatge Bèl Luéc-Scheinfeld.  

Per mielhs la conéisser, visatz lo pitit filme que Pascal e Joan-Peire fagueren ‘queu jorn :

Mma Eckkrammer passa una partida de sa vita dins sa maison dau biais de Maiçac, ‘quò fai que se torneren veire de temps en temps e, de fiau en cosdura, nasquet l’eidéia d’organizar ujan una setmana de descuberta per los estudiants sus lo tema « L’Occitània en Lemosin – linga, cultura e patrimòni ».

Vint-a-cinc estudiants participen a ‘quela session :

  • principalament daus estudiants en francés o en lingüistica que seguen dempuei lo mes de setembre un cors de linga occitana coma Mma Eckkrammer ;
  • e dos estudiants Erasmus que fagueren lors estudis en França, sens jamai auvir parlar d’occitan… e que son curios de ne’n saubre mai.

Au programa : linga, literatura, traduccion, presentacion dau trabalh de l’IEO, de las politicas lingüisticas en França, e maitot chants e cosina occitana.

En 2018, dietz-uech estudiants vendran en Lemosin per contunhar lor descuberta de l’occitan sus lo terren.

Lo despartament de romanistica de Mannheim perpausa dempuei cinc ans un cursus d’ensenhament e de rechercha sus la « Romania minor », qu’es quò dire las lingas minoritàrias (o minorisadas) romanas e creòlas a basa lexicala romana (reto-roman, catalan, sarde, occitan, papiamentu, etc.).


< Totas las novelas