Ujan, lo salon Legir a Limòtges se tendrá dau divendres 31 de març au diumenc 2 d’abriu jos las telas dau grand chapiteu dau Champ de Julhet. L’i trobaretz mai de 300 autors de literatura generala, regionala, jòunessa e benda dessenhada per de las dedicaças, daus rendetz-vos literaris, de las animacions e daus rencontres d’autors organizats tanben dins diferents luòcs culturaus de la vila.

E, per biais, l’i trobaretz la Libraria occitana que s’i ven totjorn conhar per se far conéisser un pauc mai daus Lemotjauds e daus Lemosins en generau : l’enchaison es bona per far valer las noveutats e de presentar daus autors occitans contemporaus.

Alaidonc, l’i convidem ujan :

– Monica Sarrasin, per son libre D’entre tant, quauques uns : Començavam de bien conéisser la Lison dau Peirat, que la Monica n’avia fach sos dos prumiers racontes. Dins ‘queu tresesme libre, l’autor fai lo portrach de ueit autras « figuras » de Vic.

« L’autor sap campar lo monde dins lor veritat, los sap far viure, parlar, los sap menar de cencena d’istòria, en granda justessa e libertat de ton.
Un bon libre ente, coma dins la vita, òm passa dau rire a las gremas, aquí leugier, aquí greu… La vita. » (Melhau)

Preséncia : Divendres, dissades e diumenc

– Miquèla Stenta, per Marcelle Delpastre, à fleur de l’âme. Professor de lenga e cultura occitanas pendent pas mau d’annadas en Lemosin, Miquèla Stenta viu e ensenha aura a Seta. ‘Queu libre presenta Marcela Delpastre de mai d’un biais : la femna d’abòrd, puei sa vita de paisana, e enfin son òbra de poeta, un portrach illustrat de passatges de sos memòris, e dau reportatge fotò inedich d’un grand fotografe, Charles Camberoque.

Preséncia : Divendres e dissades

De bon saubre :

– Miquèla Stenta presentará son libre divendres 31 de març a 6 oras de l’enser a La Grange a Calèches, 11, cors Vergniaud (que ribeja lo Champ de julhet). → Ne’n saubre mai

– Una mòstra « Marcela Delpastre photographiée par Charles Camberoque » se tendrá a la Librariá occitana dau 31 de març au 27 de mai. → Ne’n saubre mai

Per ne’n saubre mai

Libraria occitana – 05 55 32 06 44