« Terras comunas / Terres communes », qu’es lo darrier filme de l’IEO Lemosin, un 52 minutas que conta 150 ans de luchas socialas e d’eveniments dins la Montanha lemosina, alentorn dau portrach de l’ancian mera comunista de Tarnac, Jean Plazanet.
Tot dau long dau segle 19, daus pitits paisans paubres quiteren la Montanha per ‘nar bastir daus barris entiers de París o de Lion. Los ‘peleren los maçons de la Cruesa.
A la mesma epòca, d’autres partigueren coma boschairons o sejaires dins los bòscs de las Lanas o de Charanta.
Torneren dins lo país de lors reires emb los quauques sòus que s’avian ganhat e subretot de las eidéias novelas, ‘trapadas sus los chantiers coma los autres obriers : solidaritat, ajuda, lucha de las classas, egalitat, partatge. Fagueren eisir çò qu’un ‘pela aüei lo « comunisme rurau » e que demòra ‘na valor fòrta dins ‘quela partida dau Lemosin.
Mercès a mai d’un tesmonhatges diferents, en occitan e en francés, sus ‘quela tradicion que viu, n’um veu que los eveniments istorics que son ‘ribats apres : prumiera guerra mondiala, movements de resisténcia pendent la segonda, exòde rurau, guerra d’Argeria, etc… an pres sus ‘queu territòri un torn particulier.
Aüei una jòuna generacion a pres la releva dau movement. Autorn dau borg de Tarnac e de son espiçariá, quauqua ren de noveu es ‘trapat d’espelir per far viure d’un autre biais ‘quela Utopia generosa.
Per ne’n saubre mai – Renseignements
IEO Lemosin, Jan-Màri Caunet – 06 78 27 54 42