Institut d'Estudis Occitans
Label Òc per l'Occitan
  • Òc
  • Français
  • English

Un noveu Carnavau inspirat de legendas lemosinas

Limousinart e lo Collectiu d’artistas « La Cervelle » organizen lo prumier carnavar de la Laca de Sent-Perdos que se fará lo 29 d’abriu.
A l’origina de ‘queu carnavau, Aude Louzé, artista e professora a l’Escòla d’Art de La Sotrana, que demorava a Sent-Perdos quand l’era pita, e que voliá far quauqua ren alai, a la laca de son enfància.
I a desjà mai d’un an, venguet nos veire a l’IEO Lemosin per saber ente trobar de las informacions sus Carnavar en Lemosin (textes, fotòs…), e si quauqua ren aviá estat fach sus Sent Pardos en particulier. En mai daus libres d’Albert Goursaud, Marcela Delpastre e d’autres, Jan-Francés Vinhaud l’i faguet descubrir la mitologia lemosina.
Aude Louzé rencontret maitot l’antropològa Marie-France Houdart.

Qu’es sus ‘quelas basas que se lancet, emb d’autres artistas nauts-lemosins, dins la preparacion d’un carnavar que fará valer la Laca e set grandas divinitats inspiradas de personatges tipics tirats de contes popularis lemosins boirats d’imaginacion modèrna : lo diable Cifer, lo leberon, las martras, la mair gloglo…

Las martras… !

La Fondacion John Bost per los endechats (Belac) e set escòlas (Edouard Herriot e Odette Couty a Limòtges, Chatelac, Rancon, Rossac, Comprenhac, Sent Afòria) participen au project.
Tots ‘quilhs monde preparen daus desguisaments emb l’ajuda de l’artista Tania Zaoui.

Mascarats de leberon dins las escòlas emb Tania Zaoui

Jan-Francés dins las escòlas

En mesma temps, Jan-Francés Vinhaud fai de las intervencions dins las escòlas per parlar de Carnavar e far conéisser « Lu leberon e autres contes dau Lemosin… ».

Lo collectiu d’artistas a farjat un gente pitit libreton d’acompanhament per las escòlas que podrá, perqué pas, vos balhar ‘n’eidéia de desguisament !? Clicatz sus l’imatge per veire :


Que tot lo monde poden venir lo 29 d’abriu au Maxi-Carnavau de Sent Perdos. Quò comença a 5 oras e demia de l’enser, quò se passa a las plajas de Santran e Chabanas. Au programa, chants tradicionaus e percussions per los pitits de las escòlas, ofrendas a las divinitats de la Laca, permenada en musica emb la Batucada Limouzi Samba Gang, bale tradicionau, food trucks, beguda, concert daus « Improbables » e la vacha Carnavau (en referéncia au « buòu gras ») sirá cramada.


< Totas las novelas