La ròda vira ! Emb ‘quela annada 2022, l’IEO Lemosin comença de veire partir sos “vielhs”. ‘Na charretada emb dos desparts a la retirada ! E quò-quí, quò te fará ren ?
De qué far carcular un Conselh d’Administracion e daus salariats per assegurar ‘na transicion dins de las bonas condicions…

Prumier despart a arrosar, lo 1er de genier, emb lo Pascal Boudy. Mas, totparier, coma lu tipe es pas dau genre aisat a fotre defòra, eu n’a pas completadament sarrat sos afars. Contunhará pas mau de sas activitats en tant que benevòle. En charja dau site La Biaça dempuei sa creaccion, trabalhava dempuei quauques temps a formar quauqu’un que puesche un jorn lo relevar : e veiquí lo pitit cròta-nis de l’esquipa, lo Nicolau Granier !

Nicolau ven oficialament de jùnher l’esquipa en ‘queu mes de genier. Professor de matematicas a Limòtges, trabalha per l’IEO Lemosin doas demia-jornadas per setmana (lo dimecres apres-miegjorn e lo dijuòus matin).

Nicolau parla occitan correntament, aprenguet e contunha d’aprener, coma son grand-pair, que demòra dau biais d’Alaçac en Corresa. Apres aver segut lo cors dau Maime Caillon a la librariá, ‘chaba d’afialar sa linga en venent banturlar au ‘talier animat per Jan-Francés Vinhaud a Sent Iriés d’Aissa. Aderent de l’IEO dempuei quauquas annadas, Nicolau era desjà un benevòle actiu, qu’avetz beleu pogut crosar un dissades a la botica o dins las manifestacions de l’IEO.

Entau, nos disem un arrosatge en genier e puei fodrá resquilhar fin de març per soatar un bon despart a nòstra comptabla e administratritz, Sophie Peytoureaud, que laissará son pòste a l’IEO. ‘Chabará las quauquas annadas que ‘la a tirar avant la retirada definitiva chas son autre empluior ente trabalhava d’aicianta ‘quí los tres jorns de la setmana ente ‘la n’era pas chas nos, ALCA Novela Aquitània. Avem fach apel a un gropament d’empluiors per nos aidar a trobar una persona per la remplaçar. Lo recrutament se deuriá far dins las setmanas que venen per una presa de pòste dins lo mes de feurier.

En esperar d’aisinar daus noveus bureus au prumier estatge de la librariá, la persona trabalhará au fond de la botica, ente se fan las mòstras. Perfin qu’ela se poguessa sentir benaisa, avem decidat de ‘restar las mòstras per un temps. ‘Las deurian tornar prener quante l’estatge sirá a pus pres esgat, petaçat, propesit… Esperam per l’estiu !