La Librariá occitana mena chasca annada daus projects coma las classas d’occitan de Limòtges : emb los pitits de la Calandreta lemosina e los elevas de la Alina Mérigot au collegi-liceu Beu Peirat.
Quò permet de lor far conéisser la librariá e los libres en occitan.

En 2019, aviam trabalhat sus Lo Pitit Nicolau en lemosin. Los escolans avian pogut rencontrar la traductritz Domenica Decomps, far la Dictada dau Pitit Nicolau…

Ujan, aviam chausit de far quauqua ren sus lo tema de BD emb la Alina Mérigot e sos elevas de cinquesma.
La setmana passada, mercés a l’associacion de las Librarias Independentas de Novela-Aquitània, poguerem far venir lo dessenhaire de BD Marek Charlier (La Suite de Skolem, adaptacion de romans d’Agatha Christie coma Rendez-vous avec la mort…).
Faguet trabalhar los pitits sus una benda d’imatges de lor creacion, en occitan de segur ! Avian desjà sonjat a lor scenari, emb l’ajuda de lor professora. Dau temps de l’obrador, aprengueren a metre en paja lor istòria e a dessenhar.
Pogueren maitot pausar de las questions a Marek sus son mestier d’illustraire de BD.

Au mes d’abriu, podretz descubrir lors bendas d’imatges dins la veirina de la librariá : obludatz pas de las passar veire !
Los cinquesmas ilhs maitot vendran veire lor trabalh en veirina e per lo mesma lanç, visitaran la librariá.

Dins la premsa : Pour plaire aux jeunes, l’occitan s’apprend en BD à Limoges (Franck Jaquet / Thomas Jouhannaud, Le Populaire)