Lo Centre d’Animacion Pedagogica en Occitan (CAP’ÒC) ven de mandar 50 exemplars de sa darriera edicion, l’album Ieu l’ai, dins chasca antena Canopé de Novela-Aquitània.

‘Quel album per los cicles 1, 2 e 3 exista dins los tres dialectes de Novela-Aquitània : gascon, lengadocian e lemosin. Es acompanhat d’un CD ente lo conte es legit dins los tres dialectes, e quitament en francés.

Canopé, lo CAP’ÒC, qu’es quò qu’es ?

Canopé, qu’es quò que remplacet en 2014 lo CNDP (Centre Nacionau de Documentacion Pedagogica), e regionalament los CRDP. Qu’es un establiment public que despend de l’Educacion nacionala e que a per missions d’editar, de produir e de difusar de las ressorças pedagogicas e administrativas per los professionaus de l’ensenhament.
Sus l’Academia de Limòtges, n’i a un a Limòtges, un a Tula, e un a Gueret.

Lo CAP’ÒC, basat a Pau (64), es lo servici especific dau Raseu Canopé per la produccion de ressorças pedagogicas en occitan de la mairala au liceu.
Es maitot charjat de l’acompanhament de las politicas lingüisticas.

Justadament, au mes de genier de 2017, una convencion-cadre per lo desvelopament e l’estructuracion de l’ensenhament de l’occitan fuguet sinhada entre lo Ministèri de l’Educacion nacionala, la region Novela-Aquitània, la region Occitània e l’Ofici Public de la Lenga Occitana.
‘Quela convencion s’aplica sus las academias de Montpelhièr, Tolosa, Bordeu… Peitieus e Limòtges.

‘Quel article sus lo site de l’academia de Bordeu explica las finalitats de la convencion :
Signature d’une convention cadre pour l’enseignement de l’occitan entre le ministère de l’éducation nationale, la région Nouvelle-Aquitaine, la région Occitanie, et l’Office public de la langue occitane

De segur, per lo Lemosin, ente l’ensenhament de la lenga occitana fuguet jamai plan encoratjat, quant fuguet pas descoratjat, ‘quela convencion es istorica e balha l’esper de veire chamnhar ‘na situacion que dura dempuei tròp de temps… 

Daus libres a dispausicion daus ensenhaires e de las associacions

Una de las prumieras aplicacions de ‘quela convencion sus lo terren es la difusion de materiau pedagogic en occitan per ajudar o incitar los ensenhaires a far quauqua ren emb la lenga dins lor classa, tan ben coma las associacions que òbren dins los temps periescolars.

Darençai, chasca novela produccion dau CAP’ÒC sirá mandada en mai d’un exemplars dins totas las antenas Canopé de las regions Novela-Aquitània e Occitània. ‘Quilhs libres se poden manlevar gratuitament per trabalhar en classa.

De las pistas pedagogicas son perpausadas sus lo site dau CAP’ÒC (en occitan lo mai sovent).

Voletz far quauqua ren dins vòstra escòla ? Profitatz de ‘quela novela possibilitat e fasetz remontar vòstres besuenhs au CAP’ÒC !