Dempuei lo 16 de març, coma tot lo demai, la vita culturala occitana en Lemosin es plantada : la Librariá occitana es barrada, pus d’animacions, de « cafè platussant », de « cafè occitan », pus de permenadas contadas, pus de bravéias, pus de cors/obradors d’occitan… Qu’es la ‘chabacion !

Urosadament, l’i a internet ! En esperar que quò se dòbe, veiquí quauquas eidéias per vos far passar lo temps :

Sus la Biaça

En mai de tots los pitits tresaurs qu’avetz pas enguera descubert dins ‘quela biblioteca audiovisuela de la memòria occitana lemosina, l’esquipa de l’IEO Lemosin vos perpausa de las pitas seleccions especialas “virus”. L’i trobaratz desjà :
– de las nhòrlas per vos divertir un pauc,
– de las comptinas per ‘musar los pitits,
– de las receptas de cosina per poder se gorniflar,
– las “cronicas d’embarrament” de la Monica Sarrasin,
– ‘n’istòria de “virus” dau Nicolau Granier.
E ‘quò vai contunhar, queraque.

Las pitas videòs dau PNR Perigòrd-Lemosin

Dempuei aura tres ans, a la damanda dau Parc Naturau Regionau Perigòrd-Lemosin, l’IEO Lemosin realiza daus pitits filmes corts per far descubrir l’identitat culturala dau Perigòrd-Lemosin.
La prumiera sason se ‘pelava « Istòria de dire… a la mòda dau país » : sus lo “francitan”, la meteò, los noms de luòcs, lo vargier, las salutacions…
La segonda sason, quò fuguet per parlar dau « Bestiari fantastic dau Peiregòrd-Lemosin », entre « leberon », « lepinhon », « pauta roja » e « tòrna brun ».
La tresesma sason, « Las memòrias se sieten a tabla », qu’era alentorn de la cosina e daus biais de conservar lo minjar. E diu sap si la chausa es d’actualitat tot aura, dins un temps ente se parla de mai en mai d’autonomia alimentària…
Las darriers videòs, qu’es de las comptinas, chançons, e pitits dires : n’um l’i veu lo Patrick Ratineu, que fuguet pendent longtemps « regent chaminaire » d’occitan en Dordonha. L’i poratz aprener « La lebre », « Lu cocut » e « Los simons ».

→ Veire totas las videòs “Périgord-Limousin occitan” sus Vimeo

D’autras comptinas occitanas de visar sus Tele Miuvachas

Antan, Jan-Màri Caunet menet un ‘talier parents-mainatges de descuberta de comptinas occitanas per l’associacion Les P’tits bouts a Peira-Levada.
Apres ‘quò, los pitits fagueren de las gravaduras per illustrar las comptinas coma l’artista Sophie Petitpré, e ‘quò se ‘chabet per la creaccion de pitits filmes d’animacion emb l’ajuda de Tele Miuvachas.

→ Veire ‘quilhs pitits filmes sus lo site de Tele Miuvachas

‘Na brava randonada de preveire per « prener l’aer » apres l’embarrament

2019 veguet l’eisida de la « Granda bocla dau Parc », 200 km de chamins per far lo torn dau Parc Perigòrd-Lemosin.
Lo Jan-Francés Vinhau trabalhet sus los textes dau guide d’acompanhament que vos faran descubrir la mitologia e las richessas naturalas e culturalas de ‘queu país ente Lemosin e Peiregòrd se mariden.

→ L’itinerari
→ Lo guide d’acompanhament

Media en linha

Cronicas dins los jornaus :
→ « Limòtges en òc » dins Viure a Limòtges
→ « Lo país vos parla » dins La Montanha
→ La « Rubrica en oc » de Sud Oest

Cronicas sus França blu e autras radiòs :
→ « Limousi, mode d’emploi » sus França blu Lemosin
→ « Meitat chen meitat pòrc » sus França blu Perigòrd
→ « Un pitit bocin dau país » sus Radio Pac

Oc Tele : https://www.octele.com/
La oeb-tele en occitan vos perpausa daus programas per tots los atges !

Lo Diari : https://lodiari.com/
Una revuda culturala de qualitat qu’a maitot ‘na version papier de bon trobar a la Librariá occitana.

Diu negre : https://diunegre.com/
Un site dedicat a l’escritura e la lectura de Sciéncia Ficcion, Fantasia, Policièr e Fantastic en lenga occitana e catalana (entre autras). N’um l’i tròba de las novelas (coma ‘quelas de Nicolau Granier), daus articles, de las criticas.

Un juec videò en occitan a botar sus vòstr’ ordinator

I a gaire, surtiá « Vau serena », la version occitana lemosina dau famos juec « Stardew Valley », farjada per Danís Chapduelh.

→ Presentacion dau juec e telecharjament de la version occitana

La biblioteca occitana numerica Occitanica

Daus milierats de ressorças culturalas, educativas e scientificas per descubrir e practicar la lenga e la cultura occitanas.

Libraria-occitana.org

Lo site de venta en linha de la Librariá occitana demòra dubert : las livrasons tornen prener, faram dau mielhs per lo delai. Adonc, som a vòstra dispausicion !