« Qu’arrèsti la mea accion pr’amor qu’èi obtiengut çò que demandavi

Que soi urós d’anonciar a tots los qui m’an sostienut desempuish ua setmana qu’an ganhat ua victòria. Lo document qui demandavi desempuish lo 27 de mai que m’ei arribat a 19h30.
Qu’ei un document adreçat aus presidents de las duas regions Aquitània e Miegjorn-Pirenèus devath la fòrma d’ua letra signada deus dus ministres de l’Educacion e de la Cultura. Dens aquesta letra qu’ei indicat que l’Estat s’engatja a autorizar la creacion de l’Ofici Public de la Lenga Occitana e que s’i associarà.

Efectivament serà dens l’OPLO. Que vòu díser que participarà au son foncionament e au son finançament a costat de las regions. Qu’ei un element que n’avèvam pas podut obtiéner abans la vòsta mobilizacion.

La letra que precisa que l’OPLO serà creat abans la fin de l’estiu.

Qu’ei la pròva que quan nos amassam entà demandar çò qui ei devut a la promocion de la nosta lenga qu’ac podem obtiéner.

De segur que soi estat obligat d’emplegar un mejan d’accion hòrt. Qu’ac èi hèit pr’amor que i èri obligat, considerant qu’avèvi utilizat tots los autes mejans classics.

Que retieni d’aqueths dias, ua mobilizacion shens comparèr dab tot çò qui ei conegut. Que m’a tocada au còr la reaccion de totas e tots los qui m’an sostiengut.

Que preni donc la decision d’arrestar la mea accion puisqu’èi obtiengut tot çò que demandavi.

Que demoran hòrt de combats a miar. Qu’avem provat que n’avèvam la capacitat.

Que demandi a’us qui pòden de viéner doman dijaus 4 de junh a 16h30 devant lo Conselh Regionau d’Aquitània entà hestejar aquera victòria en favor de la lenga nosta e de la politica decidida per duas regions occitanas qui an pres consciéncia de la lor responsabilitat en aqueth maine.

Que rasseguri enfin los qui’s preocupan de la mia santat. Ua setmana shens s’alimentar qu’ei long mes non pensi pas que i agi consequéncias negativas. Que vederèi autanlèu doman un mètge e que harà un bilanç. »