Lo Manifèste
Dètz annadas après las manifestacions d’Anem Òc, Carrièras Occitanas contunha d’afirmar l’occitan coma lenga viva, populara e de societat.
L’an passat a Vilafranca de Roergue faguèrem las carrièras occitanas tot en portant l’ostal de Joan Petit. Foguèrem nombroses a voler faire moviment.
Alara, contunhem de balhar de vam a un moviment que sosten l’idèa qu’avèm besonh de diversitat culturala tant coma de diversitat ecologica o umana. Defendam una lenga per totes, que nos permeta de créisser amassa dins una societat dubèrta, conscienta de son environament coma de son istòria. Mai un pòble pòrta collectivament sa cultura, mai es capable de s’organizar, de crear, d’aculhir e de partejar.
Dins aquela dralha apelam a una manifestacion massiva a Montsegur los 17 e 18 d’octobre.
Que li digan castèl catar o fortalesa reiala, Montsegur es d’en primièr un luòc de refugi que simboliza a l’ora d’ara la resisténcia de totas las minoritats contra l’empèri.
A l’encontre d’una museificacion a fum de calhau, fagam de Montsegur un espaci viu e d’emancipacion.
Amassa, bastiscam un fare sus aqueste puèg, qu’esclaire Occitània tota e nos dubrisca al monde.
Concèrts, conferéncias e accions.
Estem nombroses !
Per ne’n saubre mai – Renseignements
Carrièras occitanas – https://www.carrieras-occitanas.eu/