Concerts, bals, contes, animacions per los enfants, vilatge occitan, salon daus editors…
Tres jorns de programacion artistica per mostrar la richéssa, la vivacitat e la legitimitat d’una cultura occitana contemporanea e originala : Venetz descobrir, rencontrar e festejar los 30 ans de l’Estivada a Sebasac los 24, 25 e 26 de julhet !
Pendent ‘quilhs tres jorns, l’IEO Lemosin vos perpausa :
- Divendres & dissades 10h-22h, diumenc 10h-19h, Vilatge : Tornatz trobar la Librariá occitana e son banc de libres.
-
Divendres 25 a 16h00, Cinemà : Projeccion : « Crin-Crau », l’emission « tota en oc » de l’IEO Lemosin sus 7ALimoges
Crin-Crau, qu’es lo bruch de la clau dins la sarralha : ’Chabatz d’entrar dins lo pitit monde occitan dau Lemosin. Sieis minutas per mes « totas en òc » farjadas per l’IEO Lemosin per 7ALimoges, de bon trobar en linha sus lo siti de la chadena, sus You tube e los malhums.
La seria festa sos cinc ans d’existéncia emb aura mai de cinquanta numeròs.
‘Quela pita emission boira cronicas e subjects corts : permenada dins Limòtges en companhiá de « memòrias » dau quartier, cronicas ornitologicas, subjects sus la cosina e lo vergier, comptinas e devinetas de sason, parcors de vitas …
En occitan, jos-titolat en francés.
Retorn sus quauqu’uns bons moments peschats dins ’quela cinquantena d’emissions… - Dissades 26 a 10h00, Cinemà : Projeccion : « Jean-Marc Siméonin, un auseu lemotjaud » de Jean-Louis Cros
Nascut a Lemòtges en 1950, Jan-Marc Simeonin ensenhet l’espanhòu e d’enchaison l’occitan.
Dessenhador, pintre, gravaire (aiga-fòrta e linogravadura), esmautaire, eimatjaire de las Edicions dau chamin de sent Jaume, mas de tant e tant d’òbras de creacion e de tradicion.
Occitanista, son òbra es marcada per son engatjament, que la lenga l-i es totjorn presenta, Lemotjaud de raiç e de còr, la vila l-i poncha plan sovent son nas.
’Quo es de tot aquò que rend compte ’queu filme, de l’artista d’excepcion, de l’òme de bon frequentar.
En francés e en occitan.
- Dissades 26 a 10h00, Vilatge : Obrador : « Topinar e batalhar » coma Jan-Màri Caunet
Dempuei quauquas annadas, l’Institut d’Estudis Occitans dau Lemosin mena per lo PNR de Miuvachas en Lemosin un trabalh de rechercha, d’enquestas etnolinguisticas sus l’alimentacion tradicionala. Pitits filmes, cartas recetas, animacions publicas… son fachas per la far conéisser e valer.
De qué descubrir quauques plats tradicionaus de la Montanha lemosina (entre Cruesa, Corresa e Viena Nauta, sabetz ben ente qu’es…), sos biais de consomar dins la societat paisana. Dins daus temps ente tant lo climat coma lo monde se desviren, s’inspirar de çò que se fasiá en quauqu’un temps, qu’es un biais d’assegurar un pauc d’autonomia…
Las recetas que vos perpausem, qu’es nautres que l’avem culidas. Eissaiaram de far ‘quilhs plats e de veire coma los adaptar a l’alimentacion d’aüei o a la mòda vege e los tastaram per l’aperitiu a miegjorn.
Au programa :
– Las crespas de blat negre (los « borriòls » daus Cantalons), qui nos servirá per butir lo minjar dins la ‘sieta, en plaça dau pan o ben de basa per daus toasts d’aperò o de dessierv.
– Un dessierv redde fach, la flaunharda, un biais de pasta a crespa emb de las pomas o daus rasims secs.
Demai, l’IEO Lemosin participará au forum « Actors e collectivitats », divendres 25 de julhet a 9h30, Salle des Tourettes.
Per visar lo programa complet, clicatz sus l’imatge !
Per ne’n saubre mai – Renseignements
gardaremlestivada@gmail.com